БРИТАНИЙ “ЭЙЧ ЭС БИ СИ” БАНКНЫ ЗАХИРЛУУД УУЧЛАЛТ ГУЙЛАА

HSBC AGM
Британий “Эйч Эс Би Си” банкны захирлууд парламентад өгсөн тайлбарынхаа үеэр банкны эргэлзээтэй үйл ажиллагаа явуулсныхаа төлөө уучлалт хүссэн байна. Тус банк нь Женевт салбараа нээх үеэрээ буюу 2006-2007 онуудад олон арван мянган үйлчлүүлэгчиддээ татвараас зайлсхийхэд нь тусалсан байна. Тус банкны ерөнхийлөгч Дуглас Флинт, захирал Стюарт Гулливер нар банк алдаа гаргасныг хүлээн зөвшөөрсөн боловч тэр цагаас хойш олон зүйл өөрчлөгдсөн хэмээн мэдэгджээ. “Дуглас бид хоёр Швейцарит банкны салбараа нээх үеэр үүссэн байж боломжгүй үйлдлүүддээ уучлалт хүсч байна. Бид бүх үйлчлүүлэгчид, хувьцаа эзэмшигчид болоод олон нийтээс уучлалт гуйж байна. Бид маш ихээр харамсаж байна. Энэ үйлдэл нь хүлээн зөвшөөрөх аргагүйгээс гадна “Эйч Эс Би Си” банкны нэр төрд муугаар нөлөөлж байна” хэмээн ноён Гулливер хэлжээ. Банкны зооринд олонд илрээгүй өөр хэрэг байгаа юу гэсэн асуултанд Дуглас Флинт “байгууллагын доод түвшинд ямар ажиллагаа явагдаж байгааг би сайн мэдэхгүй. Гэхдээ би хяналтын систем өнгөрсөн үеийнхээс хамаагүй сайжирсан гэдэгт итгэлтэй байна” гэж хариулсан байна.
Бэлтгэсэн: Ж.Тамир